بتحبها , ولا . . ؟!!!

من أول يوم دخلت فيه عالم الـ Chat و أنا شايف الناس نازلة حب فـ بعضها , طبعا أكيد مش كل الناس داخلة الـ Chat عشان تدورلها على حد تحبه يعنى و إلا تبقى مسخرة !! طيب ما يحبوا Face 2 Face بدل ما يحبوا بعض من ورا الشاشة !!!

إنما بم إن فيه ناس كتير دخلوا الـ Chat قبلى , فلما دخلت الـ Chat لقيت فلانة بتحب فلان و فلانة مرتبطة بعلان و فلانة زعلانة من صاحبها عشان مبصبصاتى و بتاع نسوان .

السّؤال بيقول , علّـل . . .

ليه الناس فـ علاقتها عبر الـ Chatting Rooms بتكون أكثر قرباً و قوّة و صداقة , و المشاعر بتبقى ملتهبة و القلب بيرفرف و الحاجات دى ؟!
هنقول إن مش كل الناس ؟ مِـش بالظبّـط . . ليـه بــقــــى ؟؟؟؟؟؟

هنفرض دلوقتى إنك مش شاب مراهق أو مهيساتى و داخل الـ Chat أو المنتديات عشان تفسّى دماغك , إنت دلوقتى راجل مثقف و كاتب أو صحفى أو مفكر من اللّى بيتصوّروا ماسكين قلم دول و ساندين دماغهم على إديهم آل يعنى بيفكّروا . .

لما تفضل تتكلم مع واحد ( أو واحدة , خاصة لو مزّة ) لمدة كبيرة من خلال الـ Net , و علاقتكم مع بعض سمن على عسل لدرجة إنكم أخدتو تليفونات بعض و بعتّو لبعض صوركم و بقيتوا أصدقاء أكتر من أصدقاء الـ Face 2 Face , هل لو كان الشخص اللى عرفته عن طريق الـ Net ده قابلته فـ الشارع أو عند 1 صاحبك أو حتى فـ صالون حلاقة لنفس المدة دى , كانت هتبقى علاقتكم بنفس القـوة ؟؟؟؟؟

أو بمعنى تانى أدق و أقوى و أقرب إلى الصحة . . .

الناس فـ علاقتها عبر الـ Net بتكون تقريباً بلا حواجز , الكلام بيبقى من القلب للقلب حتّى لو فى تكلف , إنما العلاقة نفسها بتبقى أقوى من علاقات الـ Face 2 Face , لأن إنت لما بتقابل حد فـ أى مكان إلى حد ما بيكون فِى حاجز بينك و بينه , مبتاخدش راحتك فـ الكلام معاه زى ما بتعمل فى الـ Messenger أو الـ Chat و الكلام ده , خاصة إن الـ Emotion Icons اللّى هيه الوشوش اللى بتضحك و الورود و القلوب و الحركات القرعة دى بتعمل شغل , وهلمّة جرّة من جوّة لبرّة .

عشان كده فيه بنات و ولاد كتير بيحبّوا بعض عن طريق الـ Net , مع إن البنت دى لو كانت قابلت الواد ده فـ الكلية مكنتش هتقع فِيه ولا حتى هتعبّره , و الواد نفس الحكاية ! طيّب ليه الحوَار السيكوباتِـى دَه ؟!!!

طبعاً لأن من خلال كلامهم عن طريق الـ Net مبقوش يتكلّموا من خلال حاجز مشاعرى , ده من الرّوح للرّوح , ماهم بيتكلّموا فـ جنة إلكترونيّـة بقـى !!! إنما لو كانوا اتقابلوا على أرض الواقع قبل كِده , فالكلام هيدخله تجسيد للى همّه شايفينو و سامعينو , إنما على الـ Messenger كل 1 بيتخيّل إن التانى دَه هوّه ♫ الملاك البرى , أبو قلب طيّب أوى ♫ !!

علاقتك بالناس بتكون متأثرة بالمكان اللى إنت بتقابلهم فِيه , يعنى لو قابلت 1 عند بتاع الفول و اتعرفت عليه هناك غير لما تقابل 1 فـ المنفى أو المعتقل و تبقوا إخوة فـ الكفاح المشترك اللى للأسف بقى يودى فـ 60 داهية الأيام دى . . ماهُم طول الفترة اللّى فاتت كل 1 فيهم بيختار للتانى أحسَن صور عنده و يبعتهالـو , و الكلام فى الـ Mic بيبقى آخر نقـاوة , مفيهوش لا شرشحَـة ولا شتيمة !!

طيّب لو العلاقة تطوّرت و بقوا ينزلوا مع بعض , و قلبت Face 2 Face ؟!
ماهو أساساً واقع فـ دباديب أبوها من الـ Messenger , للأسف نادر لما تلاقى حد دماغه متحررة للدرجة اللّى تخللّى افكاره السّابقة متأثّرش على رؤيته الحاليـة , مع إن البنت منظرها أوحش من صورتهـا !! إلا إنه برضو لسه واقع , ماهو تقارب الأرواح ع النت شغال بقى يا ريّس و بقت مبولَـة ( لا مؤاخذة ) !

و كم مِن ولادٍ و بناتٍ قابلو بعض بعد فترة و جيزة من علاقتهم الهلاميّة , و قسَت عليهم الأقدَار بالحقيقة المعفّنة !!!
ـ دِى طلعت بـ ضَب !!
ـ دَه طلع معفّن !
ـ دِى أطوَل مِن نهر النّيل !
ـ دَه فشلّة و يعمِل من الفيل إتنين !!!
ـ دِى عندَها إلتصَاق !
إلتِــصَــاق !!!
إلتِــصَـــااااااااااااااااااااااااااااااااق !!!!!!!!!


خلاصة الكلام عشان مبحبش الـ دُودُودُودُودُودُودُو !

أخِـى المواطِـن , أختِـى المواطِنـة . .
العَقـل قبـل القلـب دائِمـاً , و القلـب قبـل العقـل ( فِـ المشمِـش ) .
كونوا أكثر حِكمة و تفتّحـاً و إستنـارة .
لازم تِكونوا عارفين إنتو منجذبين لإيه , و ليه , و هل يا ترى لو كانت كذا كنت هأبقى كذا ؟! و هل يا ترى هوّه فعلا كذا ؟
و هكذا . . .

الكَلـب حيهَـوهَـو , و الفرخَـة هتكاكِـى ..
و القًُـط هينَـونَـو , و هـرُد شبّاكِـى ..
و القِـرد لَـو شَخشَـخ , يمسحهَـا فـ قفاكِـى ..
أنـا قلبِـى مِـش ليكِـى .. دلوقتِـى هأنساكِـى !